Cup in Ishøj (swiss german only)

scho am früeche morge hei mer nis vor der bellahoj haue besammlet und si denn uf das Ishoj gfahre, öppe 20 min. mit em auto. der räschte vo de lüt het dört scho uf öis gwartet.

im erschte spüu, weiss au nid was los gsi isch, hei mer vo aafang a diktiert und gou um gou erziut. me cha säge die angere hei überhaupt kei chance gha. scho i der haubzyt (nach 10 min.) hei mer öppe mit vier oder föif gou gfüehrt. so isches denn au der 2. haubzyt witergange und nach 20 min. isches 9 : 0 gstange für öis. s'erschte spüu am morge früeh auso gwunne.

im 2. spüut het denn der gegner scho chli meh entgege z'setze gha. s'spüu isch eigentlich usgliche gsi. mir hei denn in ungerzauh es gou chönne schiesse und zum schluss isches 3 : 1 gstange, wiederum für FFK!

s'schwerschte spüu vom tag hei mer gäge Swenmark gha. e mix us schwede und däne wie der name scho seit. mehrheitlich hei öisi gägner ufe öises gou druck gmacht und mir si mehrheitlich durch konter uf ihres gou cho. das spüut isch nume dur eis gou entschiede worde, leider hei mir das nid chönne schiesse! s'dritte spüu auso mit 1 : 0 verlore.

s'letschte spüu hei mer denn umbedingt müesse gwünne um öisi chance ufe finau no chönne z'wahre. imene ruppige spüu si mir dasmou s'team gsi wo s'entscheidende einte gou het chönne erziele und so hei mer das spüu mit 1 : 0 für öis chönne entscheide.

da Swenmark au ihres letschte spüu gwunne het si mir us gruppe 2. usgschiede und hei der finau nid dörfe bestritte.

Fazit: am morge überzügend, am nomi denn leider nümme!

das wär der spüubricht gsi vom ishoj-cup 2006. mis erschte und letschte mou a däm turnier.

/sandro
#5